Ben Bu Cihana Sığmazam - Nesimi

Son Baskı: 26.12.25 | Hesaplanıyor...

Bende Sığar İki Cihan Ben Bu Cihana Sığmazam

Nesimi

Bende sığar iki cihân ben bu cihâna sığmazam

Cevher-i lâmekân benüm kevn ü mekâna sığmazam

Kevn ü mekândur âyetüm zâti gider bidâyetüm

Sen bu nişân ile bil beni bil ki nişâne sığmazam

Kimse gümân ü zann ile olmadı Hakk ile biliş

Hakkı bilen bilür ki ben zann ü gümâna sığmazam

Sûrete bak vü ma'nîyi sûret içinde tanı kim

Cism ile cân benüm velî cism ile câna sığmazam

Hem sadefüm hem inciyüm haşr ü sırât esinciyüm

Bunca kumâş ü raht ile men bu dükâna sığmazam

Genc-i nihân benüm ben uş ayn-ı ayân benüm ben uş

Gevher-i kân benüm ben uş bahr ile kâna sığmazam

Arş ile ferş ü kâf ü nûn bende bulındı cümle çün

Kes sözünü uzatma kim şerh u beyâna sığmazam

Gerçi muhît-i a'zamüm adum âdem durur âdemüm

Dâr ile kün fekân benüm ben bu mekâna sığmazam

Cân ile hem cihân benüm dehr ile hem zamân benüm

Gör bu latifeyi ki ben dehr ü zamâna sığmazam

Encüm ile felek benüm vahy ile melek benüm

Çek dilüni vü epsem ol ben bu lisâna sığmazam

Zerre benüm güneş benüm çâr ile penc ü şeş benüm

Sûreti gör beyân ile çünki beyâna sığmazam

Zât ileyüm sıfât ile Kadr ileyüm Berât ile

Gül-şekerüm nebât ile piste-dehâna sığmazam

Şehd ile hem şeker benüm şems benüm kamer benüm

Rûh-ı revân bağışlarum rûh-ı revâna sığmazam

Tîr benüm kemân benüm pîr benüm civân benüm

Devlet-i câvidân benüm îne vü âna sığmazam

Yer ü gök düzen benüm gerü dönüp bozan benüm

Cümle yazı yazan benüm ben bu dîvâna sığmazam

Nâra yanan şecer benüm çarha çıkar hacer benüm

Gör bu odun zebânesin ben bu zebâne sığmazam

Gerçi bugün Nesîmîyüm Hâşimîyüm Kureyşîyüm

Benden uludur âyetüm âyet ü şâna sığmazam

Nesimi

👀İçerik Hakkında👇

🔄Güncelleme : 23 Ekim 2025

🔎Açıklamalar: 

☑ Bu içerik hakkında düşüncelerinizi yorumlarda belirtiniz.

☑ Şikayet veya Düzeltme isteklerinizi siirrafim@gmail.com adresine gönderebilirsiniz.

💼Kaynaklar : 

✔ Ayan, Hüseyin (hzl.) (1990). Nesîmî Dîvânı. Ankara: Akçağ. 241-242.

✦ PAYLAŞ

⚠️ Hata Bildir

✍️ Beğendiğiniz dizeleri/metinleri fareyle seçerek veya üzerine basılı tutarak hızlıca alıntılayabilir ve yorumunuza ekleyebilirsiniz.